KFA dankbaar vir ondersteuning aan plaaslike boere

Die !Kheis Farmers Association (KFA) het sy opregte dank en waardering uit aan Scatec, vir die ruim skenking van landbou-ondersteuningshulpbronne aan plaaslike boere in die !Kheis en Kai !Garib Munisipaliteite.


Die donasie bestaan uit 803 lusernbale, met ’n gemiddelde gewig van 28 kg elk, asook 283 sakke mielies van 50 kg elk. "Hierdie waardevolle insette sal ’n beduidende bydrae lewer tot die volhoubaarheid en uitbreiding van boerderybedrywighede in die gebied, veral te midde van uitdagende klimaat- en ekonomiese omstandighede. Die KFA beskou die vennootskap as ’n belangrike stap in die bevordering van landbou-ontwikkeling, voedselsekerheid en ekonomiese groei binne landelike gemeenskappe en sien uit na voortgesette samewerking met Scatec en LIMA tot voordeel van plaaslike boere." het Gershuan Baster, Sekretaris-Generaal van KFA, gesê.


Die skenking vorm deel van Scatec se uitreikprogram, wat daarop gemik is om opkomende -en kleinskaalse boere te ondersteun en hul produksievermoë binne die !Kheis & Kai !Garib Munisipaliteite te versterk. “Scatec is ’n hernubare-energieprojek naby Kenhardt en Groblershoop. Scatec het die LIMA Rural Development Foundation aangestel om hierdie program binne die !Kheis- en Kai !Garib Munisipaliteite te implementeer. LIMA werk in noue samewerking met KFA, wat 201 boere in die !Kheis verteenwoordig, asook ander sleutelrolspelers, om te verseker dat alle boere binne !Kheis voordeel trek uit inisiatiewe soos hierdie. Die program sal in Januarie 2026 voortgesit word,” het Baster, verduidelik. Inligting Gemsbok